the genealogy of JESUS

Tinuod kini nga sugilanon mahitungod sa usa ka pobre kaayo nga magtiayon sa bukid nga sa pipila lamang ka mga tuig, nakapahimugso og walo kabuok anak. Apan taliwala sa ilang kapobrehon, nadasig gihapon nila ang ilang mga anak nga moeskwela gyud bisan kinahanglan mobaklay pa sila og pipila ka mga kilometro paingon sa eskwelahan ug magbalon og ginamos o asin isip sud-an. Kini nga hiyas nila sa pagpaningkamot inubanan sa ilang pagsalig sa Dios nga nagauban kanila, ila gyud nga gihuptan sa paglabay sa mga katuigan. Karon, kining walo nga mga anak nagtrabaho na isip batid nga mga propesyonal. Katingalahan dili ba mga igsuon?
Kini nga sugilanon sa kinabuhi nagpadayag kanato nga ang kapobrehon ni ang ubang kalisdanan o kahuyang dili gayud babag alang sa kalampusan tungod sa paningkamot ug pagsalig sa kamatinud-anon sa Dios. Ang kamatinud-anon sa Ginoo kanunayng magmadaugon batok sa tanang babag ug tawhanong kahuyang. Kini makita nato sa atong mga basahon.
Ang atong ebanghelyo pananglitan nagsaysay sa kagikan ni Jesus. Daghan kaayong mga personalidad ang lakip niini gikan pa kang Abraham. Siguro ang uban kanato karon mangutana, “Nganong angay pa man ni sila hisgotan padre? Dili kaayo namo makuha ang mensahe sa ebanghelyo.” Mga igsuon, bisan tuod daw lisud makita ang mensahe niining basahona, adunay daghang mapupo gikan niini. Usa niini ang kamatinud-anon sa Dios luyo sa kasal-anan ug kahuyang sa iyang katawhan. Pinaagi sa pagsusi sa partikular nga mga detalye sa pipila ka mga kagikan ni Hesus nga gipanghisgotan dinhi, masayran nato nga daghan sa kaliwat ni Jesus mahuyang ug makasasala. Tan-awa si Jacob, dili ba nakapanglimbong man siya pinaagi sa pagkuha sa panalangin sa iyang amahan nga si Isaac nga para unta sa iyang igsuon nga si Esau? Makita usab nato ang dakong sala nga nahimo ni David tungod sa iyang pagpanapaw. Misunod dayon ang pagkahimaye sa iyang anak nga si Solomon. Ug daghan pang atong makaplagan kung atong tiwason pag-utingkay ang kinabuhi sa uban pang myembro sa banay. Apan bisan pa niana, natuman gihapon ang gisaad nga kaluwasan sa Ginoo pinaagi sa pagkatawo sa batang Hesus. Busa, ang ebanghelyo diay nagpadayag kanato nga ang mga kahuyang ug kasaypanan sa mga kagikan ni Hesus wala nahimong babag alang sa katumanan nga gisaad sa Amahan kanato diha kang Hesukristo. Ang Dios matinud-anon sa saad bisan ang katawhan makasasala. Iyang gipasinati ug gipalabay ang tanan nga anaa sa mga kagikan ni Hesus sukad pa ni Abraham, maayo man o dautan; ug bisan pa sa mga kahuyang, giangkon ug gimahal gihapon sa Dios ang tanan, pinaagi sa pagpakatawo sa Ginoong Hesus. Ang Dios tinuod gayud nga matinud-anon!

Nakakita na ba mo og usa ka inahang iring o iro, ug sa unsa nga paagi niya ipahilayo iyang anak gikan sa hulga sa mga dagkong ilaga o halas? Iyang bitbiton kini pinaagi sa pagtangag sa tangkugo ug ibalhin sa usa ka dapit nga layo sa kakuyaw. Mabantayan nato nga motiyabaw intawon ang iyang anak sa kasakit, apan kadyot ra.
Siguro kadaghanan kanato karon adunay hulga, kakuyaw, problema nga giatubang ug sama sa usa ka itoy, nagtiyabaw pa pud sa kasakit nga gibati. Tingali kini problema sa atong mga anak nga bisan sa atong mga pagpatulo sa singot, luha, ug bisan dugo, nahiagum gihapon sila sa bisyo ug barkada ug wala na magtinarong sa ilang pag-eskwela. O kaha, tungod sa kalisud sa kinabuhi, kinahanglan na nga motrabaho bisan unsa na lang para lang gyud makapalit og bugas ug gamayng sud-an. Ang uban gani tingali maglisud na og andam para sa Pasko tungod kay bisan sa unsang pagpaningkamot, wala gayud matagai og oportunidad nga makatrabaho. Tingali ang uban usab kanato nag-antos tungod sa balati-an sa lawas o kaha nagsud-ong sa myembro sa pamilya nga nag-antos sa sakit diin sa atong tawhanong limitasyon, wala na kitay mahimo kundili ang paghilak ug pagpabati na lang gyud sa atong presensya. Tingali ang uban usab kanato nag-inusara na ug anaa na sa kamingaw nga dili mauban ang mga mahal sa kinabuhi karong Pasko tungod kay atoa na sila sa layo.
Sa atong mga kasakit karon, siguro makaingon kita, “Ah, gibiyaan ko sa Ginoo! Gipasagdaan man ko Niya!” Wala kita biyae mga igsuon. Sama sa usa ka itoy, gitangag kita sa mapinanggaon ug mapanalipdanong Ginoo paingon sa usa ka luwas nga lugar diin mabati nato ang kalinaw ug seguridad.
Busa, sama nga “gitangag” sa Dios Amahan ang kahuyangon sa mga kagikan ni Hesus sukad pa ni Abraham ug gipahiluna sa kahingpitan pinaagi sa pagkatawo sa Iyang anak nga si Hesus, kita usab gidapit nga modawat ug mogakos nga puno sa paglaum sa tanang ania kanato, maayo man o dili kaayo maayo; ug angay kita nga moingon, “Ang akong mga problema o kahuyang dili diay babag sa akong gipangandoy nga maayong Kristohanong kinabuhi kay ang Ginoo dili ug dili gayud mohunong sa iyang pagkamatinud-anon ngari kanako ug sa akong pamilya! Kining akong mga nasinati karon, pamaagi sa Ginoo nga mapahiluna ako sa Iyang gipangandoy nga kalipay ug kaluwasan alang kanako ug sa akong pamilya. Kanunay lang gyud ako nga maningkamot sa kinabuhi ug magmalaumon.”
Kung ania na dayon kanato ang pagdawat ug pagsalig sa Ginoo nga Siya matinud-anon gayud kanunay, mahimong mas molawom pa ang atong kalipay sa atong pagsaulog sa Pasko!

a homily, Mt. 2:1-12

Mga igsuon, kumusta man ang atong pagsaulog sa Pasko? Sigurado nga ang kadaghanan kanato gipangkapoy pa, apan nalingaw man pud dili ba? Ang uban kanato migasto gyud para sa mga dekorasyon ug pagkaon. Ang uban pud migahin og pinaskohan nga pangregalo dili lang alang sa mga kinugos kundili alang usab sa mga bata nga anaa sa mga karsada o balay-ampunan. Ang uban pud misimba gyud kada kaadlawon bahala’g mabilar. Sa kinatibuk-an, sigurado kita nga gikapoy gyud ug gimingaw na ang tanan sa milabayng kasaulogan sa Pasko tungod kay kita sulit gyud nga mihatag sa atong mga labing bililhon o “da best” nga pagtampo sa atong kaugalingon uban sa atong mga pamilya ug sa isigkatawo.
Sa atong ebanghelyo karon, mao usab ang gibuhat sa tulo ka mga manggialamong tawo ngadto kang Hesus. Ang pagbyahe pa lang daan ug pipila ka kilometro paingon sa Bethlehem usa na ka paghatag sa “da best” alang sa batang Hesus. Mas labi pang bililhon, sa ilang pag-abot, mihalad sila ug bulawan, insenso, ug mira – mga mahalon gyud nga mga gasa – alang kang Hesus ug sa iyang pobreng pamilya. Mihatag sila sa ilang labing bililhong gasa tungod kay: una, ang ilang gitagaan bililhon pud alang kanila; ug ikaduha, sa ilang paghatag, mibalik kanila ang labing bililhong gasa sa kalipay tungod kay nahikap nila ang Hari – usa ka kalipay nga ilang gipangita nga dili kabayloan ug salapi ni bulawan.
Apan nindot palandungon nga luyo niana nga paghatag sa mga “da best” nga mga gasa, mao ang usa ka pagpadayag sa labing hinungdanon sa tanang gasa – ang gasa nga gihatag mismo sa Ginoo. Kini ang kahulugan sa misteryo sa Epipaniya nga atong gisaulog karon. Ang pulong nga EPIPANIYA gikan sa pinulongang Griyego nga nagkahulugan og “pagpadayag sa Ginoo sa iyang kaugalingon nganhi kanato.” Sa unsa nga pamaagi mihatag ang Ginoo sa iyang “da best” o bililhong gasa? Tingali ang kadaghanan nagpaabut og labing dako o “grandioso” nga gasa. Apan dili diay kini ang nahitabo. Kay bisan sa Iyang pagkahalangdon ug pagkagamhanan isip Dios, bisan mahimo gyud unta Niya nga maghari sama sa mga kalibutanong mga hari nga gagilakgilak ang bisti ug naglingkod sa taas nga posisyon sa gahum, ang Ginoo mipili nga magpakatawo sa usa ka pobre ug mapaubsanon nga pamilya, sulod pa gyud sa usa ka pasungan. Kini gibuot sa Ginoo aron iyang mapadayag nga ang Iyang pagkahari daling maduol ug mahikap sa tanan, hilabi na sa mga baho ug ubos nga mga magbalantay sa karnero ug sa tanang kabus. Kini, mga igsuon, mao ang pinaka-“da best” o labing bililhong gasa sa kaugalingon nga Iyang gihatag kanato!
Mao usab kana ang gibati sa usa ka misyonaryo sa dihang mipuyo ug miuban siya sa usa ka pamilya sa mga sidewalk vendors sulod sa unom ka adlaw. Sa unang adlaw pa lang, mibati na siya ug kaluya kay wala siya magdahom nga aduna na diay silay mga pipila ka mga appliances sulod sa balay. Apan sa pag-uban na niya sa pagpamaligya, nasinati gyud niya ang kalisud ug kamapaubsanon nga ilang nasinati kada adlaw sukad pa sa una aron lamang makalahutay, makapamalit ug mga gamit ug pagkaon ug makapaeskwela sa mga anak bisan pa sa bilar, kalaay ug kaubos (kay halos moyaka na man sa semento). Sa ingon niini nga pamaagi gipakita nila ang ilang “da best” o labing halangdon nga pagmahal sa ilang mga anak.
Karong Dominggoha, pormal nga gihuman sa kalendaryo sa atong Simbahan ang kasaulogan sa Pasko. Karon nahuman na ang pagsaulog sa Pasko; balik eskwela na pud, balik trabaho, balik na usab kita sa mga naandang lihokonon sa balay. Ang pasko giisip nato nga, kun sa kanta pa, “the most wonderful time of the year” o pinaka-nindot nga panahon sa tuig. Tinuod nga mingawon kita sa Pasko, maong moingon dayon kita, “Tutal, everyday is christmas o kada adlaw man pud ang Pasko di ba!” Apan di gyud nato malikayan nga bisan pa moingon kita “everyday is Christmas,” lahi ra gyud ang atong kasibot o kagana kun moabut ang pasko ikumpara sa mga ordinaryong adlaw, dili ba? Mas madasigon kita nga maghatagay ug mga gasa panahon sa Pasko ikumpara sa ordinaryong panahon.
Kini ang hagit sa Epipaniya: Sa unsa nga pamaagi mapadayon nato ang samang kasibot o kagana sa paghatag sa atong “da best” o labing bililhon bahin sa kaugalingon ngadto sa atong isigkatawo ug ngadto sa Ginoo sa inadlaw-adlaw natong kinabuhi?
Una, ngadto sa isigkaingon, mahatag nato ang “da best” pinaagi sa paggahin dili lang sa salapi, kundili usab sa atong oras, presensya ug talento ngadto sa mga tawong bililhon kanato – anak, ginikanan, paryente o higala. Apan ang paghatag sa “da best” dili lang ngadto sa atong mga hinigugma o higala nga makabalos pa kun atong tabangan, kundili usab ug labaw sa tanan, alang niadtong mga igsuon nato nga dili gyud makabalos kanato – mga kabus ug sinalikway sa atong katilingban nga sama sa batang Hesus sa pasungan.
Ikaduha, ngadto sa Ginoo, mahatag nato ang atong “da best” ngadto sa Dios pinaagi sa pagpakita kaniya sa hiyas sa pagkabata nga gipadayag sa batang Hesus. Sama sa batang Hesus nga, bisan sa iyang pagkahalangdon ug pagkagamhanan isip Ginoo, miduyog uban kanato diha sa labing mapaubsanon nga pamaagi, kita usab gidapit sa Ginoo nga mahimong usa ka bata atubangan kaniya: mapaubsanon, mahuyang, ug labing masaligon ngadto sa amahan. Busa, isip usa ka bata atubangan sa mahigugmaong Amahan, atong hukason ug tangtangon ang atong garbo ug kamapahitas-on sa panahon nga kita makighinabi ug maminaw Kaniya diha sa pag-ampo ug pagsimba.
Masuta dayon nato kun kinasingkasing o tinuod ba kining atong paghatag sa atong labing bililhon ngadto sa atong isigkatawo ug sa Ginoo kung sa atong paghatag sa atong “da best,” sama sa tulo ka manggialamon, mobalik ra sa atong kasingkasing ang gasa sa kalipay – kalipay nga dili ug dili gayud kabayloan sa salapi ni bulawan.